الإثنين - 19 نوفمبر 2018 - الساعة 01:36 ص
اللوك موجود من زمان ومشهور في داخل عدن والناس تحبه وتجري بعده وتشتريه ببيس وكان له اشكال والوان ياسلام على لوكنا لوك ايام زمان ومحد يعرف اللوك الا اهل عدن او من اجى وعاش في تلك الفترة في عدن وطعم وتدوق اللوك.
انا واحد من الناس من(الأطفال)كنت اجري جوري الى عند صاحب اللوك واهبله عوافي حقي كان نص شلن على شان يصلح لي شكل ويسمعنا صوته وانا اراقب طريقة البائع وهو يحرك يده ويعد من واحد وحتى عشرة.
اللوك(حالي مطه) حلوى اشتهرت ايامنا ايام زمان.
اما لوك اليوم مافيش زيه اجوا ناس لوكين فحاسين زننين يجيوا لك الضيق في معاملتهم واساليبهم وحتى طريقة كلامهم ونقاشهم وكان ابي والشيوبه حقنا زمان لما كانوا يشوفوا واحد غثي يقولوا هدا لوك زي الدناكله مايفهمش ولا يشتي يفهم هي هده الأيام اجينا على هده النامونة ومنهم مليان داخل المكاتب والإدارات وشرطك خلوهم مسؤولين تجي من هنا وتجي له من هنا وهو افلك وصانا سيدي وقالي لا ترجع لا يفهم كوعه من بوعه وياساعية جري الصمبوق يجزع اليوم كله وأنت وهو في نجره وحوري دوري من شان تقنعه بالفكره.
بالله مش عيب على هدا المسؤول او القيادي او المدير العام او الوزير في المكان الذي يحتاجوا الناس للخدمة والمعاملة الحسنة والضرورية يطرح لنا واحد لوك من حق اليوم كله يتمطمط يجيب لك الغاثي بجهله وغبائه وقلة ذوقه.
شوفوا يامسؤولين الحراسة حقكم او المرافقين هم واجهتكم إذا هم هكدا أنتم كيف بتكونوا يعني الخل من ذاك المرطبان.
يروح المواطن وضاع يومه وخسر حق المواصلات والمصاريف وقد المواطن تعبان اصلاً من الوضع الحالي الغلاء والمرض والوباء والراتب عانه وبيستين وعاده كمان يلاقي جنب كل نقطة وباب مسؤول لوك هدا قده موت وقهر.
رحم الله حقنا اللوك حق زمان كنا نروح ندور له ونجري بعده ونشتريه بفلوس اما لوكم الله لا كانه ولا كونه عسى ان تفهموا كلامي وتعملوا لكم حل وإلاشوفوا بايقولوا لكم يالله كل واحد منكم يشل قندله ويرحل وبايقع لكم يوم حامي غباره.
#المريسي
