الوطن العدنية/كتب_نزار أنور
شوف يا عاقل نحن نحبك و نحترمك و شايليناك تاج على الرؤوس، بس كدا مش تمام بالعدني زيي ما قلت حبة سنة يوم ما قيمت نحن من النوم فاكر ، يوم ما قلت لنا إنك تطمن نحن أصحاب الفيسبوك أيووووة داك اليوم.
هيا طالما و إنك تتابع نحن بالفيسبوك الله يرضى عليك و يطول لنا بعمرك ليش تتصانج نحن لما نتكلم على البترول و الدبة اللي قدها 8900 ريال و أصحاب المحطات الخاصة دون اللي يبيعوها بهذا السعر و الدولار اللي طلع لفوق و ما عرفتوا تجيبوا له ونش ينزله و محلات الصرافة اللي قدها مثل البقالات و محلات الحلاقة بس دول هم و أصحاب محلات الجملة يحلقوا جيوبنا مش ذقوننا و كمان غلقت و أجوا لنا أصحاب الورق اللي مفروض عاده الدولة تشارعهم لأنهم متنفذين على أراضي هي مش أراضيهم اليوم يا عاقل عادهم أجوا يشارعوا نحن نعم يشتوا حقهم يعني الحوثي يزبطهم هناك و يجوا هنا يترندعوا مله عييييب مش كدا يا عاقل ، نحن سمعنا كلمتك لما كنت هنا في عدن و قلت عدن لا تستحق ما يحدث فيها، و لست راضيا على أداء الكثير من مسؤوليها و قلنا أبب العاقل أجى مكشر عن أنيابه و بيشتغل أبتهم شغل الآن و بعدين جلسنا مراعيين لما خرجت لنا من عند ترامب الساعة 2 الفجر و قلت لنا الصبر ، بالله عليك يا عاقل عاد في صبر زيي صبرنا على الباطل ده كله 👆.
#نصيحة_من_إبن_محب_والله
تحرك بإتجاه إصلاح الأمور بسرعة و أضغط بكافة الوسائل على دول التحالف مش عيب دق الميز و أشتحط قليل يا فندم ، هدد بأي شيء بإنهاء دور التحالف بالإستقالة حتى بالإنتحار و لا تبقى في موقف المتفرج و نحن بنكون معك لكن طالما و إنك مش معانا في معاناتنا هذه كيف تطلب مننا الصبر و نكون معك .
#كتب / نزار أنور
