الإثنين - 10 يونيو 2019 - الساعة 06:44 م
كنا بآخر رمضان، وقررت أجرب أكله، واحد شاورمة وواحد شيبس.
اللي في الكاشير اجت عينه في عيني وسرح، اجوا اثنين بعدي عمل لهم طلبهم وانا واقف، سألته: أنا مش عاجبك يعني؟
تأسف لي وعمل الفاتورة، اجى عامل الشاورمة واخذ كرت الشاورمة، ودخلت انا اجيب الشيبس، واحد ثاني مش عارف ايش جنسيته، ولكنه شامي عموماً، اخذ كرت الشيبس ودخل يجيبه، ووقفت انا منتظر كثير جداً، سألته بعد مرور وقت اكثر من المنطقي، اتضح ان الشيبس راح بطلبية ثانية، وانتظرت اجين.
اخذت الشيبس بالنهاية ورحت اشوف موضوع الشاورمة برع، كان الواقف على السيخ واحد تاني غير اللي اخذ الكرت مني، كلمته انه لي واحد شاورمة مفروض انه جاهز، قال مافيش اي شي لك، فين كرتك، كلمت الكاشير قال له ايوة اعطيه واحد شاورمة، ووقفت منتظر، وقفت كثير اتفرج عليه وهو شغال، خلص اللي في يده واعطاه لفلان من الناس وبدأ بطلب ثاني، سألته فين طلبي، قال هات كرتك، قلت له انا واقف ساعة والكاشير كلمك، وفوق هذا تعيد نفس الكلام، قال انا اشتغل بالكروت، اجى العامل الأول اللي اخذ الكرت مني وقال له معقول هذا الشخص واقف منتظر كل هذا الوقت (يقصدني)، قلت في نفسي مش مشكلة، هانت، وبقيت منتظر، عمل طلب ثاني غير طلبي، وطلب بعده غير طلبي كمان، قلت له فين طلبي، قال هات كرتك. ولا كأن في ناس كلموه.
طلبت من الكاشير يرجع لي فلوسي، حلف يمين انه ما يرجعها وانه لازم آخذ طلبي، سبته ومشيت.
محل سيء وخدمة سيئة وعمال اطفال.
لا أنصح به أبداً، أعطيته نجمة واحدة فقط على خرائط جوجل، والنجمة كثير عليه.
